“Wengi
kuwi aku nangis sakbanter-bantere”
“Aku
ora kuwat mendhem kangen marang wong tuaku”
“Aku
pingin mulih!”
****
Jam 5 esuk aku wis tangi. Dina kuwi aku
kudu mangkat menyang Ngayogyakarta. Sanajan OSPEK
isih suwe, aku kudu nyiapne apa kang dadi tugasku kanggo OSPEK. Ra krasa, aku sing biasane mangkat sekolah mlaku saiki kudu lunga
adoh golek ngilmu. Ibu lan Bapak ndhawuhi aku supaya pinter, sregep kuliah, lan
ora neka-neka.
“Ndhuk, kowe kuwi
wis gedhe. Dadia bocah sing pinter lan sregep ya”, ngendikane Ibu.
“Iya Sri,
kuliaha sing tenanan. Ora usah neka-neka.” Bapak nambahi.
“Nggih, Bu, Pak,
Kula nyuwun donga pangestunipun supados saged kuliah kanthi lancar”
Sak durunge mangkat aku ngrangkul wong
tuaku. Aku ora nduwe adhi, Mas karo Mbak ku uga wis nduwe kluarga dhewe-dhewe.
Rasane abot ninggalke wong tuaku. Nanging aku kudu ajar mandhiri ora mung melu
wong tua terus. Bar pamit, aku langsung nyegat bis sing lewat cedhak omah.
****
Dina terakhir OSPEK aku mlaku saka kos jam 5.30 esuk. Kanggoku mangkat wayah
semono kuwi ora gampang, aku sing biasane pas SMA mangkat jam 6.45 kudu mangkat
luwih esuk. Wis 4 dina aku mangkat jam 5 esuk. Aku mangkat bareng kancaku kos
sing sak Fakultas. Nanging dina iki, aku karo kanca-kancaku Tumini karo
Yuningsih mangkat dhewe amarga beda jurusan. 4 dina kuwi tak liwati kanthi
seneng lan kesel. Tugas sing akeh rasane marai lemes. Amarga kesusu aku lali
nggawa salah siji tugas saka panitia OSPEK.
Aku lali ora nggawa buku wacan bocah kang wis tak siapake sakdurunge mangkat.
Gugusku wis ngumpul ana ngarep ruang
sing bakal dinggo OSPEK Jurusan. Tak
sawang saka gugus liyane, uga akeh sing padha klalen ra nggawa tugas. Nalika
ditakoni sapa sing ra nggawa tugas, aku ngaku. Ana SPK sing namatke aku sinis. Rasane dheg-dhegan, kaya-kaya aku arep
di-eksekusi. Bar kuwi gugusku wis
diolehne mlebu, atiku lega amarga ra ana hukuman esuk iki.
OSPEK Jurusan, rasane luwih nyenengke. Aku
isa srawung karo kanca-kanca jurusanku kang bakal dadi sak kelas. Kanca-kancaku
dijak omongan uga penak amarga basane padha. OSPEKe uga luwih santai amarga ana njero ruangan. Nanging
sakdurunge bubar, ana acara khusus saka SPK.
Koor SPK mas Doni maju lan maca
jeneng-jeneng sing ora nggawa tugas.
“Sing ora nggawa
tugas OSPEK saiki maju”, nanging ora
ana sing wani maju.
“Melita, Rizki,
Paijo, Sutrisna, Debi, karo Sisri saiki gek ndang maju!”
Jenengku disebutne keri dhewe, aku ora
wani maju. Nanging kanca-kancaku liyane sing disebutne wis padha maju. Hukuman
saka SPK dibagi dadi 2 abot karo entheng. Paijo karo Sutrisna
sing hukumane abot, digawa metu karo SPK
liyane menyang ruang liyane. Aku karo kanca-kanca liyane sing hukumane entheng
dikon nyanyi Yel-yel OSPEK. Aku ora
pati apal, amarga saben latian aku ora tau mangkat. Latian kanggo yel-yel biasane bengi bar OSPEK. Amarga ketara banget aku sing
paling ora apal, hukumanku ditambah. Aku digawa metu karo SPK. Ing ruangan liyane Paijo karo Sutrisna diseneni karo SPKne. Sutrisna sing ketok gagah,
mbrebes mripate abang arep nangis. Ing kono kuwi, aku diseneni karo SPK. Aku ora kuwat, aku nangis.
****
Bar OSPEK
aku mulih menyang kos kanthi lemes. Aku wis ora nduwe semangat kanggo nglakoni
kuliah. Tugas OSPEK kang sarwa
kesusu, marakne aku ora betah. Wengi kuwi aku nangis sakbanter-bantere. Aku ora
kuwat mendhem kangen marang wong tuaku. Aku pingin mulih! Urung nganti 2 minggu,
aku wis pingin mulih terus. Banjur ana tilpun saka wong tuaku.
“Halo, Assalamu’alaikum, Ndhuk piye OSPEK mu?”
“Wa’alaikumsalam,
Bu, Kula mboten kiyat!”, nangisku saya banter.
“Lho, ana apa
ta, Nduk?”
“Tugas OSPEK kathah sanget, Bu. Kula kesel,
Kula dihukum, Kula didukani. Kula pingin wangsul! Kula mboten kiyat piyambakan
wonten ngriki”.
“Ndhuk, tugas OSPEK kuwi ora sepira. Suk yen kowe wis
kerja, bakal luwih akeh tugas lan alangan sing kudu mbok liwati. Saiki kowe
wis gedhe, wis wayahe kowe kuwi ajar urip
mandhiri, ora mung nunut wong tua terus. Donya iki pancen ora gampang, Ndhuk.
Sukmben ana wayahe kowe urip dhewe tanpa Ibu lan Bapakmu iki. Nanging kowe kudu
kuwat! Wis ta, yen arep crita kowe isa nilpun Ibu utawa Bapak. Ibu lan Bapakmu
nang kene iki mung bisa ndongani kowe supaya bisa dadi bocah sing pinter, kuwat
lan mandhiri”, ngendikane Ibu.
“Nggih Bu, matur
nuwun sanget awit wejanganipun. Kula nyuwun ngapura menawi rikala OSPEK kula mboten saged paring kabar. Matur nuwun
sanget, Bu”.
“Ya uwis, Ndhuk.
Semono dhisik wae. Mengko yen ana apa-apa sms utawa tilpun wae ya?”
“Nggih, Bu. Matur nuwun sanget”, banjur
Ibu nutup tilpune.
Alhamdulillah, tilpun saka Ibu mau wis
rada ngayemne ati. Saiki aku eling meneh apa tujuanku mangkat rene. Aku kuliah
adoh iki ora mung merga aku pingin pinter, nanging aku uga kudu mandhiri lan
isa ngadhepi kahanan uripku sukmben. Merga OSPEK iki aku dadi ngerti,
piye rasane rekasa dadi mahasiswa kang nyata. Saktenane, iki durung apa-apa,
isih ana wolung semester sing kudu dakadhepi. Aku isih kelingan, yen lakuku
dadi mahasiswa ora mung dhewe. Isih ana kanca-kancaku sing bakal nglakoni urip
sing susah iki bebarengan. Bar OSPEK
iki, aku kudu sinau ngadhep buku lan kuliah maneh. Aku kudu isa urip adoh saka
wong tua. Aku kudu kuwat!
(Rizal Yanwar PBD A 2013)
Tidak ada komentar:
Posting Komentar